🌲 जामडी फॉरेस्टमधील मृतदेहाचं गूढ उकललं… धक्कादायक सत्य 😱🔍🧠 ‘दृश्यम’सारखं नियोजन… पण पोलिसांसमोर सत्य आलंच! 🚨🧩

पोलीस ठाणे कन्नड ग्रामीण हद्दीतील जामडी फॉरेस्ट गावालगतच्या वनक्षेत्रात एका अनोळखी व्यक्तीचे प्रेत आढळून आल्याची माहिती 13 जानेवारी 2026 रोजी पोलिसांना मिळाली. माहिती मिळताच स्थानिक गुन्हे शाखेचे पथक व कन्नड ग्रामीण पोलीस ठाण्याचे कर्मचारी तात्काळ घटनास्थळी दाखल झाले. घटनास्थळी पाहणी करून जामडी गावात विचारपूस करण्यात आली असता, जांभळी गावातील काही व्यक्तींनी मयताची ओळख पटवली. मयताचे नाव राजू रामचंद्र पवार, रा. जामडी, ता. कन्नड, जि. छत्रपती संभाजीनगर असे निष्पन्न झाले.

याप्रकरणी मयताचा नातेवाईक प्रकाश रामचंद्र पवार यांनी दिलेल्या फिर्यादीवरून पोलीस ठाणे कन्नड ग्रामीण येथे गु.र.नं. 08/2026, कलम 103(1), 238 BNS प्रमाणे गुन्हा दाखल करण्यात आला. सदर गुन्हा गंभीर स्वरूपाचा असल्याने पोलीस अधीक्षक डॉ. विनयकुमार राठोड आणि अपर पोलीस अधीक्षक अन्नपूर्णा सिंह यांनी घटनास्थळी भेट देऊन स्थानिक गुन्हे शाखा व पोलीस ठाणे कर्मचाऱ्यांना गुन्हा उघडकीस आणण्याच्या सूचना दिल्या. त्यानुसार पोलीस निरीक्षक विजयसिंग राजपूत यांनी स्थानिक गुन्हे शाखेची दोन पथके व कन्नड ग्रामीण पोलीस ठाण्याचे एक पथक तयार करून तपास सुरू केला. तपासादरम्यान घटनास्थळाच्या आसपास झाडी, नाले व शेतांची बारकाईने पाहणी करण्यात आली.

यावेळी मयताच्या अंगावरील अंडरपँट, फुटलेला मोबाईल व चप्पल या वस्तू मृतदेह आढळलेल्या ठिकाणापासून काही अंतरावर वेगवेगळ्या ठिकाणी आढळून आल्या. त्यामुळे संशय अधिक बळावला. दिनांक 13/01/2026 ते 20/01/2026 या कालावधीत तब्बल 8 दिवस सतत तपास करून 50 पेक्षा अधिक संशयितांची चौकशी करण्यात आली. मात्र सुरुवातीला कोणताही ठोस सुगावा लागत नव्हता. मयत हा बंजारा समाजातील असल्याने, त्या समाजाची भाषा जाणणाऱ्या व्यक्तींमार्फत गुप्त माहिती काढण्यात आली. तपासात असे निष्पन्न झाले की, मृतदेह आढळलेल्या ठिकाणालगतचे शेत राजू जोधा पवार यांचे असून ते शासकीय सेवेत आहेत.

त्यांची पत्नी वंदना पवार व मुलगा धीरज उर्फ टेमा हे शेत कसत होते. घटनेच्या दिवशी दोघेही शेतात उपस्थित असल्याची माहिती मिळाल्यानंतर  सखोल चौकशी करण्यात आली. तपासादरम्यान कबुली दिली की, मयत राजू पवार हा तिच्याकडे वारंवार शारीरिक संबंधांची मागणी करत होता.

त्याला कंटाळून याला सर्व हकीकत सांगितली व दोघांनी मिळून त्याचा खून करण्याचा कट रचला. 13/01/2026 रोजी सकाळी  राजू पवार याला शेतात बोलावले. ठरल्याप्रमाणे तो झाडीमध्ये आला असता, मुलाने त्याच्या डोक्यात मारले आणि आईने त्याचे गुप्तांग दाबून त्याचा खून केला. पुरावा नष्ट करण्यासाठी मृतदेह वनक्षेत्रातील नाल्यातील झाडाच्या मुळाशी लपवण्यात आला. दिशाभूल करण्यासाठी कपडे, चप्पल व मोबाईल वेगवेगळ्या ठिकाणी फेकून देण्यात आले.

आरोपी धीरज उर्फ टेमा याने क्राइम पेट्रोल, CID आणि ‘दृश्यम’ चित्रपट पाहून गुन्ह्याचे नियोजन व पुरावा नष्ट करण्याची पद्धत शिकल्याचेही तपासात उघड झाले. स्थानिक गुन्हे शाखेच्या पथकाने आरोपी दोघेही रा. जामडी फॉरेस्ट, ता. कन्नड, यांना अटक केली असून त्यांनी गुन्ह्याची कबुली दिली आहे. पुढील तपास पोलीस ठाणे कन्नड ग्रामीण करत आहे.