😨 एका घरात पाच मृतदेह 😱 सरकारी कर्मचाऱ्याचं घर ठरलं मृत्यूचं कोडं 🔐🩸

उत्तर प्रदेशातील सहारनपूर जिल्ह्यात एका धक्कादायक घटनेने खळबळ उडाली आहे. शहरातील एका वसाहतीत एका सरकारी कर्मचाऱ्याच्या घरात एकाच वेळी पाच जणांचे मृतदेह आढळून आल्याने परिसरात भीतीचे वातावरण पसरले आहे. मृतांमध्ये सिंचन विभागात लिपिक म्हणून कार्यरत असलेला कर्मचारी, त्याची पत्नी, वृद्ध आई आणि दोन अल्पवयीन मुलांचा समावेश आहे.

सकाळपासून घराचा दरवाजा बंद असून कोणताही प्रतिसाद मिळत नसल्याने शेजाऱ्यांनी पोलिसांना माहिती दिली. पोलिसांनी घटनास्थळी धाव घेऊन घरात प्रवेश केला असता एका खोलीत पाचही मृतदेह रक्ताच्या थारोळ्यात पडलेले आढळून आले. प्राथमिक पाहणीत सर्वांच्या डोक्याला गोळी लागल्याचे दिसून आले आहे.

घटनास्थळावरून काही शस्त्रे जप्त करण्यात आली असून फॉरेन्सिक पथकाने पुरावे संकलित केले आहेत. प्राथमिक तपासात हा प्रकार हत्या-आत्महत्येचा असण्याची शक्यता पोलिसांकडून व्यक्त करण्यात येत असली तरी सर्व शक्यता तपासल्या जात आहेत. मृतक कर्मचाऱ्याने घटनेपूर्वी कुटुंबातील नातेवाइकांना एक संदेश पाठवल्याची माहिती पोलिसांना मिळाली असून त्याचा तपासात विचार केला जात आहे.

या घटनेमागे आर्थिक तणाव, कौटुंबिक वाद किंवा मानसिक दबाव कारणीभूत होता का, याचा शोध घेण्यात येत आहे. शवविच्छेदन अहवाल आणि फॉरेन्सिक तपासानंतरच मृत्यूचे नेमके कारण स्पष्ट होणार असल्याचे पोलिसांनी सांगितले. प्रकरणाचा पुढील तपास सुरू आहे.