🍺 सलग १२ दिवस दारू बंद तर ‘तळीरामांमुळे रुग्णालये भरतील’! 🏥 पुण्यातील दारूबंदीवर हायकोर्टाची टिप्पणी ⚖️🚨

पुणे : गणेशोत्सवाच्या काळात पुणे जिल्ह्यात सलग १२ दिवस दारूविक्री बंद ठेवण्याच्या प्रशासनाच्या निर्णयावर मुंबई उच्च न्यायालयात प्रश्न उपस्थित करण्यात आला. हॉटेल व्यावसायिक आणि वाईन्स शॉप असोसिएशनने या निर्णयाविरोधात दाखल केलेल्या याचिकेवर सुनावणी करताना उच्च न्यायालयाने राज्य सरकार आणि पुणे जिल्हा प्रशासनाच्या भूमिकेवर तीव्र नाराजी व्यक्त केली.

मुख्य न्यायाधीश एम. सी. त्रिपाठी आणि न्यायमूर्ती अद्वैत सेठना यांच्या खंडपीठासमोर या प्रकरणाची सुनावणी झाली. प्रशासनाने सरसकट १२ दिवस दारूबंदी लागू करण्यामागील भूमिकेवर न्यायालयाने प्रश्न उपस्थित केले.

‘१२ दिवस दारूबंदी केली तर रुग्णालयेच भरतील’

सुनावणीदरम्यान खंडपीठाने नियमित मद्यपान करणाऱ्या व्यक्तींवर अचानक दीर्घकाळ मद्य खरेदीचे निर्बंध लादल्यामुळे उद्भवू शकणाऱ्या आरोग्यविषयक समस्यांचा मुद्दा उपस्थित केला.

अशा व्यक्तींना सलग अनेक दिवस मद्य खरेदी करण्यापासून अचानक रोखल्यास गंभीर वैद्यकीय आणि आरोग्याच्या समस्या निर्माण होऊ शकतात, असे निरीक्षण नोंदवत न्यायालयाने मिश्किलपणे म्हटले की, अशा प्रकारे सलग १२ दिवस दारूबंदी केल्यास या तळीरामांमुळे रुग्णालयेच भरतील.

मद्यपान करणारी प्रत्येक व्यक्ती कायदा-सुव्यवस्थेचा प्रश्न ठरते का?

दारूचे सेवन करणारी प्रत्येक व्यक्ती कायदा आणि सुव्यवस्थेसाठी समस्या निर्माण करेल, असे सरसकट गृहीत धरता येणार नाही, असा मुद्दाही न्यायालयाने उपस्थित केला.

संपूर्ण महाराष्ट्रात अशा स्वरूपाची बंदी नसताना केवळ पुणे जिल्ह्यातच १२ दिवसांचा निर्णय का लागू करण्यात आला, असा सवाल खंडपीठाने केला. प्रशासनाचा आदेश मनमानी असल्याचे सांगत तो मागे न घेतल्यास न्यायालय हस्तक्षेप करेल, असा इशाराही देण्यात आला.

अखेर १२ दिवसांच्या सरसकट दारूबंदीचा आदेश मागे

न्यायालयाने घेतलेल्या कडक भूमिकेनंतर राज्य सरकार आणि पुणे जिल्हा प्रशासनाने आपल्या निर्णयात बदल करण्याची तयारी दर्शवली.

त्यानुसार, सलग १२ दिवस दारूविक्री बंद ठेवण्याचा सरसकट आदेश मागे घेण्यात आला आहे. आता गणेशोत्सवाच्या संपूर्ण १२ दिवसांऐवजी गणेश चतुर्थी अर्थात गणपती आगमन आणि विसर्जनाच्या दिवशीच मुख्यत्वे निर्बंध ठेवण्याची सुधारणा करण्यास सहमती दर्शवण्यात आली आहे.