🚨 जमिनीच्या वादाचा थरारक शेवट! घरावर ४ ते ५ वेळा बोलेरो पिकअप आदळली; ७५ वर्षीय वृद्ध महिलेचा मृत्यू

अकोला : बार्शीटाकळी तालुक्यातील जामवसु गावात जागा आणि जमिनीवरून सुरू असलेल्या जुन्या वादाला हिंसक वळण मिळाले. सकाळी ८ वाजताच्या सुमारास बबन दादाराव घुगे याने बोलेरो पिकअप जाधव यांच्या घरावर आणि अंगावर घातल्याचा आरोप आहे. या घटनेत सोनाबाई मखराम जाधव (वय ७५) यांचा जागीच मृत्यू झाला, तर अन्य तीन जण गंभीर जखमी झाले. या घटनेचा व्हिडिओ सोशल मीडियावर व्हायरल झाला आहे.

जागा आणि जमिनीवरून सुरू होता वाद

जामवसु गावातील जगदीश जाधव, गणेश जाधव आणि बबन दादाराव घुगे यांच्यात गेल्या काही काळापासून जागा आणि जमिनीवरून वाद सुरू होता. सकाळी ८ वाजताच्या सुमारास या वादाने गंभीर स्वरूप धारण केले.

यावेळी बबन घुगे याने रागाच्या भरात बोलेरो पिकअप थेट जाधव यांच्या घरावर आणि अंगावर घातल्याचा आरोप आहे. एवढ्यावरच हा प्रकार थांबला नाही. पिकअप ४ ते ५ वेळा मागे-पुढे करून घरावर आदळण्यात आल्याने घराचे मोठे नुकसान झाले.

पळापळीत वृद्ध महिला गाडीखाली

पिकअप घरावर आदळल्यानंतर घरात आणि घराबाहेर उपस्थित असलेल्या लोकांमध्ये पळापळ झाली. याच गोंधळात सोनाबाई मखराम जाधव (वय ७५) या पिकअपखाली चिरडल्या गेल्या. त्यांचा घटनास्थळीच मृत्यू झाला.

या घटनेत अन्य तीन जण गंभीर जखमी झाले असून त्यांच्यावर सध्या रुग्णालयात उपचार सुरू आहेत.

घटनेचा व्हिडिओ सोशल मीडियावर व्हायरल

या संपूर्ण घटनेचा एक व्हिडिओही समोर आला असून तो सोशल मीडियावर व्हायरल झाला आहे. जामवसु गावातील या घटनेमुळे परिसरात खळबळ उडाली आहे.

मुख्य आरोपीसह तीन संशयितांना अटक

घटनेची माहिती मिळाल्यानंतर बार्शीटाकळी पोलीस आणि अप्पर पोलीस अधीक्षक घटनास्थळी दाखल झाले. पोलिसांनी तातडीने कारवाई करत मुख्य आरोपी बबन दादाराव घुगे, तसेच रश्मिका घुगे आणि सोनू घुगे या तीन संशयितांना अटक केली आहे.

घटनेनंतर परिसरात पोलीस बंदोबस्त तैनात करण्यात आला असून जखमींवर रुग्णालयात उपचार सुरू आहेत.